*GEDAR Langile kazeta
Amerikako Estatu Batuetako presidente Donald Trumpek proposamen bat egin dio Ukrainako presidente Volodimir Zelenskiri, gerrari bukaera emateko negoziaketen barruan: Donbassen lurralde-banaketa bat onar dezala esan dio, Errusiako Federazioarekin su-etena lortzeko oinarri gisa. Hala eman dute jakitera AEBetako eta Europako komunikabideek.
Aurreko ostiralean Trumpek eta Zelenskik Etxe Zurian egindako bilera «tentsio handikoa» izan zela diote hainbat hedabidek: Ukrainako buruak Tomahawk irismen luzeko misilak eskatu omen zituen, baina Trumpek «gerra gelditzeko» eskatu zion. «Putinek nahi badu, suntsitu egingo zaitu», esan omen zion AEBetako presidenteak, Financial Times-ek aipatutako iturrien arabera.
Zelenskik ondoren baieztatu duenez, Errusiak eutsi egiten dio Ukraina Donetsk eta Luhansk eskualdeetatik erretiratzeko eskakizunari, eta hori «onartezina» dela dio. Hala ere, gonbidatzen badute, prest agertu da ustez Budapesten izango den bilerara joateko. Bilera horretan Trumpek eta Putinek parte hartuko lukete, Viktor Orban Hungariako lehen ministroaren bultzadarekin.
Ziurgabetasun diplomatikoaren aurrean, Europar Batasuneko herrialdeak Kievi laguntzeko pakete berri bat prestatzen ari dira, hiru neurri nagusirekin: finantzaketa gehiago, armamentu-hornidura gehiago eta Errusiaren aurkako zigor ekonomiko gehiago. Gainera, Europan izoztutako aktibo errusiarren (140.000 milioi euro inguru) zati bat erabiltzeko aukera eztabaidatzen ari dira, Ukrainaren aurrekontu-egonkortasuna bermatzeko; eta Moskuk salatu du «lapurreta» izango litzatekeela hori, Nazioarteko Zuzenbidearen arabera.
Bruselan, hainbat gobernuk azpimarratu dute «Kievek eta Moskuk soilik» erabaki beharko dutela edozein lurralde-akordio, kanpoko inposiziorik gabe. «Ezin da indarraren erabilera saritu», adierazi du Kaja Kallas Europar Batasuneko Kanpo Arazoetarako goi-ordezkariak, gerra su-etena lortzeko nazioarteko presioek markatutako fase berri batean sartzen den bitartean.
